స్వాతంత్ర్య భారత్ న్యూస్, పినపాక: భద్రాద్రి కొత్తగూడెం జిల్లా పినపాక మండలంలోని వలస ఆదివాసీ గ్రామాల్లో ఛత్తీస్‌గఢ్ రాష్ట్రం బీజాపూర్ ఎమ్మెల్యే విక్రమ్ మడివి పర్యటించారు. మండలంలోని మద్దులగూడెం, తిర్లాపురం సుందరయ్య నగర్ ప్రాంతాల్లో పర్యటించిన ఆయన వలస ఆదివాసీ గిరిజనులతో నేరుగా మాట్లాడి వారి సమస్యలను అడిగి తెలుసుకున్నారు.
ఈ సందర్భంగా పలువురు ఆదివాసీ గిరిజనులు తమ సమస్యలను ఎమ్మెల్యే దృష్టికి తీసుకెళ్లారు. తాము ఎన్నో ఏళ్లుగా వలస వచ్చి ఇక్కడ నివసిస్తున్నప్పటికీ పోడు భూములకు పట్టాలు లేక తీవ్ర ఇబ్బందులు ఎదుర్కొంటున్నామని ఆవేదన వ్యక్తం చేశారు. అంతేకాకుండా తమకు కుల ధ్రువీకరణ పత్రాలు కూడా లేకపోవడంతో ప్రభుత్వ పథకాలు, విద్య, ఉపాధి తదితర అంశాల్లో అనేక సమస్యలు ఎదురవుతున్నాయని తెలిపారు.
గిరిజనులు వివరించిన సమస్యలను ఎమ్మెల్యే విక్రమ్ మడివి సానుకూలంగా విన్నారు. వారి సమస్యలను సంబంధిత స్థానిక మంత్రులు, తెలంగాణ ముఖ్యమంత్రి దృష్టికి తీసుకెళ్లి పరిష్కారానికి కృషి చేస్తానని హామీ ఇచ్చారు. వలస ఆదివాసీలకు ఎదురవుతున్న ఇబ్బందులను అధికారుల దృష్టికి తీసుకెళ్లి, సమస్యల పరిష్కారానికి అవసరమైన చర్యలు తీసుకునేలా ప్రయత్నిస్తానని తెలిపారు.
ఈ సందర్భంగా సీపీఎం జిల్లా కమిటీ సభ్యులు నిమ్మల వెంకన్న వలస ఆదివాసీలు ఎదుర్కొంటున్న సమస్యలను ఎమ్మెల్యేకు వివరించారు. అలాగే సింగిరెడ్డిపల్లి సర్పంచ్ పండా ముక్తేష్, ఉప సర్పంచ్ కిషోర్ కూడా ఆదివాసీల సమస్యలను ఎమ్మెల్యే దృష్టికి తీసుకెళ్లారు. పోడు భూములకు పట్టాలు, కుల ధ్రువీకరణ పత్రాలు తదితర సమస్యలపై ప్రత్యేకంగా వివరించారు.
అనంతరం ఆదివాసీ సంఘాల నాయకులు, గిరిజనులు, సింగిరెడ్డిపల్లి సర్పంచ్, ఉప సర్పంచ్‌లు కలిసి ఎమ్మెల్యే విక్రమ్ మడివిని ఘనంగా సన్మానించారు. ఈ సందర్భంగా ఎమ్మెల్యే మాట్లాడుతూ గిరిజనుల సమస్యలను పరిష్కరించేందుకు తన వంతు కృషి చేస్తానని తెలిపారు.
పర్యటనలో భాగంగా ఎమ్మెల్యే విక్రమ్ మడివి మద్దులగూడెం గ్రామంలో గిరిజనులతో కలిసి భోజనం చేశారు. దీంతో గ్రామస్తులు ఆయనతో తమ సమస్యలను మరింత స్వేచ్ఛగా పంచుకున్నారు. వలస ఆదివాసీ గ్రామాల్లో ఎమ్మెల్యే పర్యటన సందర్భంగా స్థానికులు తమ సమస్యలు ప్రభుత్వం దృష్టికి చేరుతాయని ఆశాభావం వ్యక్తం చేశారు.