స్వాతంత్ర్య భారత్ న్యూస్, అచ్చంపేట: వన్యప్రాణి వారోత్సవాలు–2026లో భాగంగా అచ్చంపేట పట్టణంలోని ఎన్‌టీఆర్‌ స్టేడియంలో వాకర్స్‌ క్లబ్‌ సభ్యులకు పాముల సంరక్షణ, రక్షణపై అవగాహన కార్యక్రమం నిర్వహించారు. పాములపై ఉన్న అపోహలను తొలగించి, వన్యప్రాణుల పట్ల ప్రజల్లో అవగాహన పెంపొందించడమే కార్యక్రమం ఉద్దేశమని నిర్వాహకులు తెలిపారు. ఈ సందర్భంగా స్నేక్‌ క్యాచర్‌ సుమన్‌, జూనియర్‌ అసిస్టెంట్‌, అచ్చంపేట ఫారెస్ట్‌ బీట్‌ ఆఫీసర్‌ హన్మంతు నాయక్‌ పాముల వివిధ జాతులు, విషపూరిత–విషరహిత పాముల గుర్తింపు, వాటి ప్రవర్తన, నివాస ప్రాంతాలపై వివరించారు. పాములు పర్యావరణ సమతుల్యతలో కీలక పాత్ర పోషిస్తాయని, ఎలుకలు తదితర హానికర జీవుల నియంత్రణలో వాటి ప్రాధాన్యత ఎంతో ఉందని తెలిపారు. ఇళ్లలోకి పాములు ప్రవేశించినప్పుడు ప్రజలు భయపడకుండా వాటిని చంపకుండా, సురక్షిత దూరంలో ఉండి శిక్షణ పొందిన స్నేక్‌ రెస్క్యూ సిబ్బందికి సమాచారం ఇవ్వాలని సూచించారు. పాముకాటుకు గురైనప్పుడు తీసుకోవాల్సిన తక్షణ జాగ్రత్తలు, మూఢనమ్మకాలకు దూరంగా ఉండాల్సిన అవసరాన్ని వివరించారు. ప్రతి పాము ప్రమాదకరమైనది కాదని, ప్రకృతి సమతుల్యత కోసం పాముల సంరక్షణ అవసరమని అవగాహన కల్పించారు. వాకర్స్‌ క్లబ్‌ సభ్యులు ఆసక్తిగా పాల్గొని పాములకు సంబంధించిన సందేహాలను అడిగి తెలుసుకున్నారు. వన్యప్రాణి వారోత్సవాల సందర్భంగా ప్రకృతి, వన్యప్రాణులు, జీవవైవిధ్య పరిరక్షణపై ప్రజల్లో అవగాహన పెంపొందించేందుకు అటవీ శాఖ ఆధ్వర్యంలో మరిన్ని కార్యక్రమాలు నిర్వహించనున్నట్లు నాగర్‌కర్నూల్‌ జిల్లా అటవీ అధికారి శ్రీ రేవంత్‌ చంద్ర, IFS తెలిపారు.