స్వాతంత్ర్య భారత్ న్యూస్, పినపాక: వి.బి.జి. రాంజీ చట్టాన్ని రద్దు చేసి మహాత్మా గాంధీ జాతీయ గ్రామీణ ఉపాధి హామీ పథకం పేరునే కొనసాగించాలని డిమాండ్ చేస్తూ బోటిగూడెం గ్రామపంచాయతీ పరిధిలో గ్రామస్తులు నిరసన చేపట్టారు. రోజుకు ఒక్కో కూలీకి రూ.800 వేతనం చెల్లించాలని, ప్రతి కుటుంబానికి ఏడాదికి 200 పని దినాలు కల్పించాలని సీపీఎం జిల్లా కమిటీ సభ్యులు, వ్యవసాయ కార్మిక సంఘం జిల్లా ఉపాధ్యక్షులు నిమ్మల వెంకన్న డిమాండ్ చేశారు. ఈ కార్యక్రమంలో నూప కృష్ణ, సర్పంచ్ నూప బాపనమ్మ, నూప లక్ష్మయ్య, మడివి జోగయ్య, బాడిశ నరసయ్య తదితరులు పాల్గొన్నారు.
రహదారి కోసం గ్రామస్తుల వినతి
చింతలపాడు, విప్పలగుంపు గ్రామాలకు రహదారి సౌకర్యం కల్పించాలని కోరుతూ గ్రామస్తులు గ్రామసభలో సర్పంచ్ నూప బాపనమ్మకు వినతిపత్రం అందజేశారు. సరైన రహదారి సౌకర్యం లేక ప్రజలు తీవ్ర ఇబ్బందులు ఎదుర్కొంటున్నారని, సంబంధిత అధికారులు స్పందించి రహదారి నిర్మాణానికి చర్యలు తీసుకోవాలని గ్రామస్తులు కోరారు.
