అన్నాచెల్లెళ్ల అనుబంధానికి ప్రతీకగా రాఖీ వేడుకలు
గుండాల మండలం ఆగస్టు 29 (స్వాతంత్ర్య భారత్) ప్రతినిధి
గుండాల మండల కేంద్రంతో పాటు పరిసర గ్రామాల్లో రక్షాబంధన్ వేడుకలను ప్రజలు ఘనంగా నిర్వహించారు. అన్నాచెల్లెళ్ల మధ్య ప్రేమ, ఆప్యాయత, అనుబంధానికి ప్రతీకగా జరుపుకునే రక్షాబంధన్ సందర్భంగా మహిళలు, బాలికలు తమ సోదరులకు రాఖీలు కట్టి శుభాకాంక్షలు తెలిపారు. సోదరులు తమ సోదరీమణులకు జీవితాంతం అండగా ఉంటామని హామీ ఇస్తూ రక్షాబంధన్ శుభాకాంక్షలు తెలియజేశారు.
ఉదయం నుంచే ఇళ్లలో సందడి నెలకొంది. చిన్నారుల నుంచి పెద్దల వరకు కొత్త దుస్తులు ధరించి రాఖీ వేడుకల్లో పాల్గొన్నారు. పలువురు మహిళలు, బాలికలు రాఖీలు, స్వీట్లు కొనుగోలు చేసేందుకు స్థానిక మార్కెట్లకు తరలివచ్చారు. దీంతో గుండాల ప్రధాన వీధుల్లో సందడి వాతావరణం కనిపించింది.
ఈ సందర్భంగా పలువురు మాట్లాడుతూ రక్షాబంధన్ కేవలం రాఖీ కట్టే పండుగ మాత్రమే కాకుండా కుటుంబ సభ్యుల మధ్య ప్రేమాభిమానాలను మరింత బలపరిచే పండుగ అని అన్నారు. అన్నాచెల్లెళ్ల మధ్య ఆత్మీయత, పరస్పర గౌరవం, నమ్మకం పెంపొందించడమే ఈ పండుగ ప్రత్యేకత అని పేర్కొన్నారు.
గ్రామీణ ప్రాంతాల్లోనూ ప్రజలు సంప్రదాయబద్ధంగా రక్షాబంధన్ వేడుకలను నిర్వహించడంతో పండుగ వాతావరణం నెలకొంది. పలుచోట్ల సోదరులు, సోదరీమణులు పరస్పరం మిఠాయిలు పంచుకుని ఆనందాన్ని వ్యక్తం చేశారు.