ఖబర్ధార్ కాంగ్రెస్ నాయకులారా.. రేగా కాంతారావుపై అడ్డగోలుగా మాట్లాడితే సహించం
పినపాక: మాజీ ఎమ్మెల్యే రేగా కాంతారావుపై కాంగ్రెస్ పార్టీ నాయకులు వ్యక్తిగతంగా, అడ్డగోలుగా మాట్లాడితే సహించేది లేదని బీఆర్‌ఎస్‌ పార్టీ ఎస్సీ, ఎస్టీ విభాగం మండల అధ్యక్షులు కాయం శేఖర్‌, గుదిగొండ రామకృష్ణ హెచ్చరించారు. ఆయనను కించపరిచేలా వ్యాఖ్యలు చేస్తే తీవ్రస్థాయిలో ప్రతిస్పందిస్తామని స్పష్టం చేశారు. బుధవారం ఏడూళ్లబయ్యారం క్రాస్‌రోడ్‌లోని బీఆర్‌ఎస్‌ పార్టీ కార్యాలయంలో నిర్వహించిన సమావేశంలో వారు మాట్లాడారు.
కాంగ్రెస్ నాయకులు రాజకీయ విమర్శల పేరుతో వ్యక్తిగత విషయాలను ప్రస్తావించడం సరికాదని వారు అన్నారు. న్యాయస్థానం తీర్పు ఇచ్చిన తర్వాత కూడా రాజకీయ లబ్ధి కోసం కేసుల అంశాన్ని ప్రస్తావించడం సిగ్గుచేటని విమర్శించారు. రేగా కాంతారావుపై పెట్టిన కేసును ఆయన న్యాయస్థానంలో ఎదుర్కొని న్యాయపరంగా విజయం సాధించారని తెలిపారు. చట్టపరమైన అంశాలను రాజకీయాలకు ఉపయోగించుకోవడం మానుకోవాలని కాంగ్రెస్ నాయకులకు సూచించారు.
పినపాక నియోజకవర్గ ప్రజలు రేగా కాంతారావును రెండుసార్లు ఎమ్మెల్యేగా గెలిపించారని, ఆ విజయాలు కాంగ్రెస్ పార్టీ వల్ల మాత్రమే సాధ్యమయ్యాయని భావించడం సరికాదని వారు పేర్కొన్నారు. 2014లో కాంగ్రెస్ పార్టీ నుంచి టికెట్‌ ఇవ్వకపోయినా పార్టీ కోసం కష్టపడి పనిచేసి నియోజకవర్గంలో పార్టీని బలోపేతం చేయడంలో రేగా కాంతారావు కీలక పాత్ర పోషించారని గుర్తుచేశారు. రాజకీయంగా ఎన్నో ఒడిదుడుకులు ఎదురైనా ప్రజలతో అనుబంధాన్ని కొనసాగించారని తెలిపారు.
పినపాక నియోజకవర్గం ఒకప్పుడు కమ్యూనిస్టుల కంచుకోటగా ఉన్న సమయంలో తొలిసారి రేగా కాంతారావు విజయం సాధించారని వారు అన్నారు. అనంతరం బీఆర్‌ఎస్‌ పార్టీలో చేరి నియోజకవర్గ అభివృద్ధికి కృషి చేశారని పేర్కొన్నారు. ప్రజల సమస్యలను తెలుసుకుని వాటి పరిష్కారానికి కృషి చేశారని చెప్పారు. ముఖ్యంగా పోడు భూములకు పట్టాలు ఇప్పించడంలో, గ్రామాల్లో బీటీ రోడ్లు, సీసీ రోడ్లు, చెక్‌డ్యాంలు, వంతెనలు తదితర అభివృద్ధి పనులు చేపట్టడంలో రేగా కాంతారావు పాత్ర ఉందని వారు పేర్కొన్నారు.
ప్రజల కోసం పనిచేసిన నాయకుడిపై రాజకీయ ప్రత్యర్థులు హద్దుమీరి మాట్లాడితే నియోజకవర్గ ప్రజలే తగిన సమాధానం చెబుతారని కాయం శేఖర్‌, గుదిగొండ రామకృష్ణ అన్నారు. ప్రస్తుతం రేగా కాంతారావుపై విమర్శలు చేస్తున్న కాంగ్రెస్ నాయకులు గతంలో ఏ పార్టీలో ఉన్నారో ఒకసారి ఆత్మపరిశీలన చేసుకోవాలని సూచించారు. మీ నాయకులు ఏ పార్టీ నుంచి రాజకీయ ప్రస్థానం ప్రారంభించారు? ఏ పార్టీ తరఫున తొలిసారి ఎమ్మెల్యేలుగా గెలిచారు? రెండోసారి ఏ పార్టీ నుంచి విజయం సాధించారు? అనే విషయాలను ప్రజలు కూడా గమనిస్తున్నారని అన్నారు.
తమ నాయకుడిని రాజకీయంగా ఎదుర్కోలేక అక్రమ కేసులు పెట్టడం ద్వారా ఇబ్బందులకు గురిచేయాలని ప్రయత్నించారని వారు ఆరోపించారు. అయితే రేగా కాంతారావు న్యాయస్థానాన్ని ఆశ్రయించి చట్టపరంగా పోరాడారని, న్యాయస్థానం తీర్పు అనంతరం ఆయనకు బీఆర్‌ఎస్‌ నాయకులు, కార్యకర్తలు, అభిమానులు ఘన స్వాగతం పలికారని తెలిపారు. తమ నాయకుడు ఎప్పటికప్పుడు కార్యకర్తలకు అండగా ఉంటూ, వారి కష్టసుఖాల్లో తోడుగా నిలిచారని చెప్పారు. అందుకే ఆయనకు కార్యకర్తలు, అభిమానులు అండగా నిలుస్తున్నారని పేర్కొన్నారు.
కాంగ్రెస్ ప్రభుత్వం ఎన్నికల సమయంలో ప్రజలకు ఇచ్చిన ఆరు గ్యారెంటీల అమలుపై దృష్టి పెట్టాలని వారు డిమాండ్‌ చేశారు. ప్రజలకు ఇచ్చిన హామీలను పూర్తిస్థాయిలో అమలు చేయకుండా ప్రతిపక్ష నాయకులపై విమర్శలు చేయడం ద్వారా ప్రజల దృష్టిని మళ్లించే ప్రయత్నం చేయవద్దని సూచించారు. ఆరు గ్యారెంటీల అమలుపై ప్రశ్నిస్తే, వాటికి సమాధానం చెప్పకుండా గత ప్రభుత్వ నాయకులపై కేసులు, రాజకీయ విమర్శల గురించి మాట్లాడటం సరైన విధానం కాదన్నారు.
ప్రజలకు ఇచ్చిన హామీలను నెరవేర్చే వరకు రేగా కాంతారావు నాయకత్వంలో బీఆర్‌ఎస్‌ క్యాడర్‌ ప్రజా సమస్యలపై పోరాటం కొనసాగిస్తుందని వారు తెలిపారు. ప్రజా సమస్యలను ప్రభుత్వం దృష్టికి తీసుకెళ్లడం, హామీల అమలుపై ప్రశ్నించడం తమ బాధ్యత అని స్పష్టం చేశారు. రాజకీయ విమర్శలు చేయడం కంటే ప్రజలకు ఇచ్చిన హామీలను అమలు చేయడంపై కాంగ్రెస్ ప్రభుత్వం దృష్టి పెట్టాలని కోరారు.
ఇదే సమయంలో కాంగ్రెస్ నాయకులు రేగా కాంతారావుపై వ్యక్తిగత విమర్శలు చేయడం మానుకోవాలని వారు హెచ్చరించారు. రాజకీయంగా విమర్శలు ఉంటే విధానపరమైన అంశాలపై మాట్లాడాలని, వ్యక్తిగత విషయాలను రాజకీయాల్లోకి తీసుకురావడం సరికాదని అన్నారు. హద్దులు దాటి మాట్లాడితే బీఆర్‌ఎస్‌ నాయకులు, కార్యకర్తలు ప్రజాస్వామ్య పద్ధతిలో తగిన సమాధానం ఇస్తారని పేర్కొన్నారు.
ఈ సమావేశంలో బీఆర్‌ఎస్‌ పార్టీ యూత్‌ విభాగం అధ్యక్షులు యాటగిరి చెన్నకేశవులు, మైనార్టీ విభాగం అధ్యక్షులు షేక్‌ జాంఘీర్‌, నాయకులు మునిగెల సంతోష్‌, పూసా సంతోష్‌, ప్రవీణ్‌, దాసరి రవి, బడే సాగర్‌, యూత్‌ నాయకులు సంతోష్‌, చర్పా శరత్‌, సాయికుమార్‌, తోట రాంబాబు, రాంప్రసాద్‌, సింహద్రి రాజు, భువనగిరి సంతోష్‌, నాగరాజు, కోడిరెక్కల రమేష్‌, బాలకృష్ణ, విశ్వనాధం, చంటి, వేంపల్లి గంగయ్య, కొమరం రామకృష్ణ, గోగు రామకృష్ణ, కొర్సా రమేష్‌, కొప్పుల రంజిత్‌, వల్లెపోగు చంటి, గాడిద గణేష్‌, అరుణ్‌ తదితరులు పాల్గొన్నారు.
Tags
పినపాక