గోదారమ్మ క్యాంపులో వీధి కుక్కల స్వైర విహారం.. ప్రజల్లో భయాందోళన

గోదారమ్మ క్యాంపులో వీధి కుక్కల స్వైర విహారం.. ప్రజల్లో భయాందోళన

భద్రాద్రి కొత్తగూడెం జిల్లా బూర్గంపాడు మండలం సారపాక మేజర్ గ్రామపంచాయతీ పరిధిలోని గోదారమ్మ క్యాంపులో వీధి కుక్కలు, కోతుల బెడద రోజురోజుకు పెరుగుతోంది. మహిళలు, వృద్ధులు, చిన్నారులపై వీధి కుక్కలు విరుచుకుపడుతుండటంతో స్థానికులు భయాందోళనకు గురవుతున్నారు.

స్థానికుల కథనం ప్రకారం, చేతిలో కవర్లు లేదా ఆహార పదార్థాలు పట్టుకుని బయటకు వెళ్లిన వారిపై కుక్కలు, కోతులు ఎగబడుతున్నాయి. వాటిని తరిమే ప్రయత్నం చేసిన వారిపై కూడా దాడులకు పాల్పడుతున్నాయని తెలిపారు.

గత వారం రోజుల వ్యవధిలో గోదారమ్మ క్యాంపులో నలుగురిని వీధి కుక్కలు కరిచినట్లు సమాచారం. తాజాగా ఈరోజు మరో మహిళపై దాడి చేసి గాయపరిచిన ఘటన స్థానికులను మరింత ఆందోళనకు గురిచేసింది.

గ్రామసభలో వీధి కుక్కలు, కోతుల సమస్యపై ఇప్పటికే తీర్మానం చేసినప్పటికీ ఇప్పటివరకు సమస్యకు శాశ్వత పరిష్కారం లభించలేదని ప్రజలు ఆవేదన వ్యక్తం చేస్తున్నారు. గ్రామాల్లో ప్రజల భద్రతను దృష్టిలో ఉంచుకుని సంబంధిత అధికారులు వెంటనే చర్యలు తీసుకుని వీధి కుక్కలు, కోతుల బెడదను నివారించాలని సారపాక మేజర్ గ్రామపంచాయతీ ప్రజలు కోరుతున్నారు.

#Sarapaka #GodarammaCamp #StrayDogs #MonkeyMenace #Burgampadu #BhadradriKothagudem #PublicSafety #TelanganaNews #SBNews