బూర్గంపాడు పోలీస్ స్టేషన్‌లో నిశ్శబ్ద ప్రేమ విజయం
మాట్లాడలేని ప్రేమికుల పెళ్లి… పోలీసుల మానవత్వం చాటుకున్న ఘనత
భద్రాద్రి కొత్తగూడెం జిల్లా బూర్గంపాడు పోలీస్ స్టేషన్‌లో అరుదైన, హృద్యమైన ఘటన చోటుచేసుకుంది. మాట్లాడలేని, వినలేని యువ జంట తమ నిశ్శబ్ద ప్రేమను వివాహ బంధంగా మార్చుకుంటూ పోలీసుల సమక్షంలో ఒక్కటైంది.
చిన్ననాటి నుంచే మూగ–చెవిటి వైకల్యంతో బాధపడుతున్న ఇరువురు, సంకేత భాష ద్వారా అనేక సంవత్సరాలుగా పరస్పర భావాలను పంచుకుంటూ ప్రేమను బలపరుచుకున్నారు. అయితే కుటుంబాల అంగీకారం లభించకపోవడంతో వీరు పోలీసులను ఆశ్రయించారు. స్పందించిన పోలీసులు ఇరువురు కుటుంబాలను కౌన్సిలింగ్ చేసి అంగీకారం తీసుకోవడంలో సఫలమయ్యారు.
తరువాత పోలీస్ స్టేషన్ ఆవరణలోనే ఇరు కుటుంబాల సమక్షంలో జంట దండాలు మార్చుకుని పెళ్లి పూర్తిచేసుకుంది. మాటలు లేకున్నా, చూపులు–సైగలతో వ్యక్తమైన ప్రేమ అందరినీ కన్నీటి పర్యంతం చేసింది.
ఈ మానవతా విలువను నిలుపుకున్న బూర్గంపాడు పోలీసుల సేవాభావాన్ని స్థానికులు ప్రశంసిస్తున్నారు. ప్రేమకు అడ్డంకులేవని, శారీరక వైకల్యం ప్రేమను ఆపలేదని ఈ వివాహం సమాజానికి గొప్ప సందేశంగా నిలిచింది.
Tags
burgampadu