మొంథా తుఫాను బాధితులకుఊరట: ఆర్ అండ్ ఆర్ ప్యాకేజీ సర్వే షురూ

మొంథా తుఫాను బాధితులకుఊరట: ఆర్ అండ్ ఆర్ ప్యాకేజీ సర్వే షురూ

అచ్చంపేట ఎమ్మెల్యే డాక్టర్ వంశీకృష్ణ ప్రత్యేక చొరవతో  కేశ్యాతండా, మర్లపాడు తండా ప్రజలకు భరోసా

నాగర్ కర్నూల్, (ఎస్ బి న్యూస్):

అచ్చంపేట మండలంలో ఇటీవల సంభవించిన 'మొంథా' తుఫాను కారణంగా తీవ్రంగా నష్టపోయిన వరద ప్రభావిత ప్రాంతాల ప్రజలకు ఊరట కలిగించేందుకు జిల్లా యంత్రాంగం కదిలింది. ముంపునకు గురైన ప్రజలను ఆదుకునే లక్ష్యంతో, పునరావాసం మరియు పునర్నిర్మాణ (R&R) ప్యాకేజీ అమలు కోసం సోమవారం సర్వే పనులు అధికారికంగా ప్రారంభమయ్యాయి. స్థానిక ఎమ్మెల్యే డాక్టర్ చిక్కుడు వంశీకృష్ణ గారి ప్రత్యేక చొరవ, పట్టుదల ఫలితంగానే ఈ ఆర్ అండ్ ఆర్ ప్యాకేజీపై ప్రత్యేక జీఓ జారీ అయినట్లు అధికారులు తెలిపారు.

ఎమ్మెల్యే కృషికి కృతజ్ఞతలు

వరద ముంపు ప్రాంతాల ప్రజలను ఆదుకోవాలని ఎమ్మెల్యే డాక్టర్ వంశీకృష్ణ గారు చేసిన విజ్ఞప్తి మేరకు జిల్లా యంత్రాంగం వెంటనే స్పందించింది. ముఖ్యంగా ముంపునకు గురైన కేశ్యాతండా, మర్లపాడు తండా ప్రజల తరపున ఎమ్మెల్యే కృషికి ప్రత్యేక ధన్యవాదాలు తెలియజేస్తున్నట్లు స్థానికులు తెలిపారు. ఎమ్మెల్యే నిరంతర పర్యవేక్షణ, అధికారులపై ఒత్తిడి కారణంగానే సర్వే ప్రక్రియ వేగవంతమైందని వారు పేర్కొన్నారు.

కేశ్యాతండాలో సర్వే ప్రారంభం

జిల్లా కలెక్టర్ బాదావత్ సంతోష్ మరియు ఎమ్మెల్యే డాక్టర్ చిక్కుడు వంశీకృష్ణ గారి ఆదేశాల మేరకు, అచ్చంపేట తహశీల్దార్ సైదులు ఆధ్వర్యంలో కేశ్యాతండా గ్రామంలో సోమవారం సర్వే పనులు, పరిశీలన మొదలయ్యాయి.

ఈ సందర్భంగా తహశీల్దార్ సైదులు మాట్లాడుతూ, కేశ్యాతండాలో మొత్తం 89 కుటుంబాలు ఉన్నాయని తెలిపారు. "వరద నష్టాన్ని అంచనా వేయడానికి అవసరమైన సమగ్ర సర్వేను వారం నుంచి పది రోజుల్లో పూర్తి చేస్తాము," అని ఆయన వెల్లడించారు.

అలాగే, బురద ప్రభావంతో నష్టపోయిన మర్లపాడు తండా గ్రామంలో కూడా రెండు మూడు రోజుల్లో సర్వే పనులు చేపడతామని తహశీల్దార్ తెలిపారు.

అధికారుల బృందం పరిశీలన

ఈ సర్వే పనుల్లో ఇరిగేషన్, రోడ్లు మరియు భవనాలు (R&B), హార్టికల్చర్, పంచాయతీ రాజ్, రెవెన్యూ, అటవీ శాఖ తదితర కీలక శాఖలకు చెందిన అధికారులు పాల్గొంటున్నారని తెలిపారు. పలు శాఖల సమన్వయంతో క్షేత్రస్థాయిలో నష్టాన్ని అంచనా వేసి, ఆర్ అండ్ ఆర్ ప్యాకేజీని సమర్థవంతంగా అమలు చేసేందుకు నివేదికను రూపొందించనున్నారు.

ఈ సర్వే నివేదిక ఆధారంగా, త్వరలో వరద బాధితులకు పునరావాసం కల్పించి, మెరుగైన జీవితాన్ని అందించేందుకు ఆర్ అండ్ ఆర్ ప్యాకేజీ నిధులు విడుదలయ్యే అవకాశం ఉందని తెలుస్తోంది.